Vorvedderdaag?
26. Yuli 2005
Mer brauche zwaar en “Deitscher” Feierdaag.
Ich meinn, das entweeder 6 Oktower adder 20 Yuni unser “Vorvedderdaag” waerre sett. Am 20 Yuni 1683 hot der Francis Daniel Pastorius die Deitscheschteddel gegrindt, un dann am 6 Oktower die erschte Deitsche vun der Eirop nach Amerika gsegelt sinn. Die sinn unsere Vorvedder (unsere Vorgenger?). Mer sett ihre Beschteiere begucke.
Was denkt ihr drum?
Deitschi Wikipedia?
06. Yuli 2005
Der Dan Stolzfus hot mir neilich en Brief gschriwwe. Er hot aagewwe, as mer en Deitsch Wikipedia uffschtelle sett. Ich geb ihm recht. Mir brauche fimf Verwelter hawwe. Er iss erscht, un ich bin zwett. Wer hot Indresse?
Sell iss en wichdich Geleyeheit fer uns un fer alle Deitsche! Loss mich wisse, wenn du Indresse hoscht.
Die Sechs un Sechzichscht Fersommling fun Baerricks Kounty
28. Matz 2005
‘S waar awwer en scheeni Zeit bei der 66scht Fersommling vun Barricks Kaundi im Leesport. Der ganz Vendublatz waar voll mit Deitsche neigepackt. Die Esse hot waricklich gut gschmackt: gebacke Schunkfleesch, gereescht Hinkel, Grautzelaat mit Raahm, Lattwarrick mit Schmierkees, Welschkann, Aerbse, Grummbeerfillsel, un nooch meh.
Parre Merrill Ressler hot zu uns iwwer der Hoiet gelese. Dann hemmer etliche Lieder gsunge, un der Donald Breininger hot zu uns iwwer gfarebte Oier gschwetzt. Sell waar en gut Schtick – arg gschpasslich!
Ich hab mich geschder mit viele neie, interessantische Leit bekanntgmacht. Die Leit waare freindlich un warrim. Die Myusick (Deitsch un “Deutsch”) waar gschpasslich. Leider interessiere sich zu wennich yunge Leit in die Fersommlinge. Vielliecht kemmer en “Yungends Versammling” erschaffe. Mer brauche modernischi Myusick uff Deitsch un annere Dinger, die die Yugend gleiche. Wer hot nooch Gedanke?
Der Ring 2 Kummt Net Vollkreis
U.S. Freilosing: 18 Matz 2005
Dauer: 1:45
MPAA Bewaerting: PG-13 (Gwalt, ausgwaxe Sache, katzweilich Flucherei)
Kast: Naomi Watts, Simon Baker, David Dorfman, Elizabeth Perkins, Gary Cole, Sissy Spacek
Fiehrer: Hideo Nakata
Vorbringer: Laurie MacDonald, Walter F. Parkes
Schirmschpiel: Ehren Kruger
Filmschreiwer: Gabriel Beristain
Myusick: Hans Zimmer
U.S. Ausdeeler: Dreamworks
Errinscht du dich an Der Ring? Dunkel, schreckich, un fellich graddelich?
Leidich kann ich net sogaar iwwer ‘em Ring 2 saage.
Er waar net schlimm, awwer er waar aa net greslich. Der Ring waar meschdens iwwer der Mythologie vum Video un der Mythologie vum Meedli Samara. Der Ring 2 waar meschdens iwwer ‘em Bu, Aiden, un seiner Eegedum bei die Samara. ‘S waar halwer “Ring” un halwer “Poltergeist 3.” Zu viele Wadde un net genunk Plot.
Im Ring, die schrecklichscht Sach waar der Video vun Samara un Anna Morgan. Der Video schpielt blos en glee Aadeel im Ring 2. ‘S gibt aa ee Deel mit etliche Hasch, die so glaar Rechling-gmacht sinn dass ‘s lenkt iss. Die Naomi Watts un der David Dorfman schpiele ihre Aadeeler gut, awwer die Aadeeler sinn selwert schwacher. Die Samara bedraagt sich zufallich…. net so wie im Ring, wu sie absichtlich scheint…. un im Ring 2 kann sie sich arrick schnell aus der Brunne ausreisse!
As hawwich schee gsaagt, der Ring 2 iss net schlimm… awwer ihr sette net zu viel ihm zumude. Nadurlich iss der Aahenger selde so gut wie der Aafanger.
Deitscherei.org gibt ihm 2.5 Distelfinke vun 5.
22 Marz 2005
Deitscherei.org
